”Kalitkan” animatsiedu eri maguh
Karjalan piälinnas 31. oraskuudu—1. kezäkuudu pietäh enzimäine animatsien festivuali. Pivon nimekse pandih Kalitka. Sit suau kaččuo moizii fil’moi, kudamii ei sua nähtä toizes kohtas — internetas, TV:s.
Kahten päivän aloh huondespuoles ildassah Premjer-kinoteatras ruvetah ozuttamah animatsiifil’moi. Enzimäzet ozutukset algavutah 10.30 čuasun aigah, jälgimäzii ozutetah 21.00 čuasun ildua. Programmas on kui lapsile tarkoitettuloi da perehinneh kačottavii fil’moi, mugai nuorii miellyttäjii. Ildupuoles ozutetah mostu kinuo, kudamua voibi kaččuo vaigu 18 vuottu vahnembile.
— Ottavuimmo täh ruadoh da abuh meile tuli Sofja Aleksejeva, kudai valmistau Banka-kinofestivualii Petroskois. Sit ruadoh yhtyi Premjer-kinoteatru, sanoi Oma Mediale Marija Saveljeva, MultiKi-animatsiistuudien piälikkö, festivualin valmistai.
Aijan aloh Kalitka-festivuali keräi aiga suuren abuniekoin joukon — Karel’skaja gornitsa -restoruanu, Zorinoin ruadopaja, Karjalan rahvahan taijonkeskus, Bekkerjoy, InturLider, Cheese Photo da toizet.
Festivualis ozutetah kui vakkinazien, mugai meigäläzien luajittuloi animatsiikinoloi. Kalitkah yhtytäh Ol’eg Obnosovan piän al ruadai Jessoilan ”Valgien kodine”, Petroskoin Taidoškola. Vakkinazii festivualis rodieu kymmene hengie. Hyö tullah Moskovas, Piiteris, Saratovas da Dzeržinskaspäi.
— Emmo voi hommata pahakse mielekse meijän gostile ilmastu matkua da Petroskois eländiä, ga valmistimmo heile hyvän programman. Meijän fesituvalin abuniekoin vuoh hommuammo gostitukset da ekskursien linnua myöte, sanoi Marija Saveljeva.
Petroskoi on enzimäine Ven’an luodehpuolen pienis linnois, ken ottavui animatsiifestivualin pidämizeh. Festivualin valmistajat kačotah pivon tuloksii, sih tulluzien luguloi da piätetäh, kui puaksuh vois pidiä moizii festivualiloi.
Yhty Oman Median kanualah MAX:as!
