Kalevalan päivä: šuurie tapahtumie ta kirkkahie vaikutelmie
Tuiskukuun 24.—28. päivinä Petroskoissa vietetäh viisi šuurta kulttuuritapahtumua, kumpaset on šijotettu Kalevalan päiväh, ilmottau Karjalan tašavallan kulttuuriministerijö.
Tänäpiänä Karjalan kanšallini teatteri näyttäy musiikki- ta runonäytelmä nimeltä Kalevala:Kuvahaini.
— Še yhistäy Karjalan kanšallisšoitinorkesterin ta teatterin artistoja. Väinämöisen, Ainon, Ilmarisen ta Louhen kuvien kautti kaččojat šuahah uuvvella tavalla käsitella ikuhisie aiheita — valintua, luonnon voimua, mänetyštä ta toivua, kerrotah ministerijön tiijotukšešša.
Šamoin Kanšallisešša teatterissa toimiu Karjala on Kalevalan mua -näyttely.
Tuiskukuun 26. päivänä Kanšalliskirjaštošša avautuu Kalevalan mosaiikki -festivali. Kävijät kuunnellah runoja muailman eri kielillä ta musiikkimuokkaukšissa.
Tuiskukuun 27. päivänä Kuklateatteri esittäy KALEVALA.Runot -spektaklin. Valkovenäläini ohjuaja Oleg Ž’ugžda esittelöy omua mieltä ta tulkintua Kalevalašta.
Karjalan kanšallini musejo kuččuu perintehelliseh pruasniekkah Kalevalan päivän kunnivokši 28. tuiskukuuta. Vierahie vuotetah eri kerhot, luvennot, ekskursijot ta työpajat.
Šamana päivänä Kanšallini teatteri esittäy Giperborejalaini-spektalin. Ohjuaja Jegor Černišov ta dramakirjuttaja Anastasija Bukrejeva on luajittu nykyaikani starina Lemminkäiseštä ta yhissetty Ahin, Kaukon ta runoelman eeppisien henkilöjen starinoja.
Muut kulttuurilaitokšet niise järješšetäh omie tilaisukšie. Näin 25. tuiskukuuta Petroskoin valtijonkonservatorijašša pietäh Kalevala: matka eepossua myöten musiikin ta mualaukšien kera -konsertti, a 27. tuiskukuuta — Monimuotoni Kalevala -konsertti.
Aihiešta voit lukie niise šuomekši.
Yhty Oman Median Telegram-kanalah!
