Kalevalan päivänny – ”Kalevalan pajoloi”
Kalevalan päivänny Kižin muzei kuččuu Kalevalan pajuo -tyttispektaklin enzi-ildah. Kižin muzein folklouru-etnogruafine joukko 28. tuhukuudu ozuttau kummallizen ezityksen muailman roindas, vagavas vahnas Väinämöizes, urholoin tegolois, seppy Ilmoillizen svuad’bas da kummallizes Sampo-melličäs.
Spektaklis rodieu äijy rahvahallistu pajuo — svuad’bupajuo, joiguu, runuo, tiedovuo — da soittuo perindöllizil soittimil. Ozutelman käzikirjutuksen luajittih Kižin muzein ruadajat Arina Anhimkova da Natalja Mihailova.
— Meijän joukol jo oli kogemustu tyttispektakliloin luajindas Ga tämä ozutelmu on meil hätken vuotettu da enzimäine, kuduan luajimmo Kalevalan pohjal, sanoi Oma Mediale Natalja Mihailova, Kižin muzein folklouru-etnogruafizen joukon johtai.
Ven’ankieline tyttiozutelmu perustuu Eino Kiurun da Armas Mišinan luajittuh Kalevalan kiännökseh. Ozutelmu on adaptiiruittu lapsile kačottavakse. Sih voijah tullah rahvas perehinneh.
Tytit spektaklih nähte valmisti Polina Čufir’ova, kudai ruadau Karjalan Tyttiteatras. Spektaklin enzi-ildu roihes 28. tuhukuudu Kižin muzein lapsien keskukses Fedosovan pihal, 19. Spektaklii ozutetah kahteh kerdah — 13.00 da 15.00 čuasun aigah. Ližiä tieduo ozutelmah da lippuloih nähte täs.
Yhty Oman Median kanualah Telegramas!
