Tänä vuotena valittu Kalevalan ošakunnan johtaja Vladimir Stepanov tuttavuštuu johtokunnan jäšenien kera, antau heilä tehtävie ta pitäy keškušteluja järješšön toiminnašta tulovaisuošša.
– Kalevalan ošakunnan tarkotukšena on yhistyä Kalevalašta šyntynyitä ihmisie, jotta yheššä šäilyttyä tietoja kotimuašta. Kalevalašta šiirty elämäh Petroskoih ylen äijän taitajie ihmisie ta on mukava pityä vaštautumisie ta käsitellä erilaisie teemoja, korošti Vladimir Jakovlevič.
Uuvven piämiehen joholla niise paissah šuunnitelmista täkši vuuvvekši.
– Piätapahtumana on ošallistumini Kalevalan piirin 95-vuotisjuhlan šekä šen Keškipol’ničan 100-vuotisjuhlan viettämiseh. Niise kunnan jäšenet ošallissutah piirin tapahtumih ta pruasniekkoih, autetah tilaisukšien järještämiseššä šekä ratkaisomisešša sosialikyšymykšie, mit košetah teijen kuntuo tai kalaššuššiäntöjä paikallisilla eläjillä, lisäsi uuši johtaja Vladimir Stepanov.
Nykyjäh Kalevalan ošakunnalla on oma šivu VK-sosialiverkošša. Šitä toimittau Irina Kuz’mina. Järještön jäšenet ollah tervehtullehie ošallistumah toimintah šekä šeuruamah kunnan ta piirin uutisie.
Kalevalan ošakunnan jäšenet piettih vuosikokouš kevätkuun lopušša, missä paistih nykytärkeistä kyšymykšistä ta valittih uuši johtaja. Šitä ennein vuuvvešta 2017 Kalevalan ošakunnan johtajana olija Raisa Samodajeva.