Kalevalan ošakunta piti perintehellisen kokoukšen
Kalevalan ošakunnan kokouš piettih Karjalan kanšojen yštävyštalošša. Tällä kertua pakina oli Osmo Borodkinin kuvataijošta ta hänen Kalevala-runojen käsikirjutukšešta.
Esitykšen valmisti kalevalalaini, istorikko, Karjalan kanšallisen musejon spesialisti Sofja Nikitina. Kokoukšeh tulluot tiijuššettih mukavie tietoja taiteilijan lyhyöštä elämäštä. Niitä tutkija šai Borodkinin kirjasista perehellä ta muisselmista taiteilijašta. Niise oli kerrottu hänen kuvataijošta, šovanaikasešta ta šen jälkiseštä elämäštä.
— Kaikešta mukavimpana oli löytyä runojen käsikirjutušta. Šiinä on runoja ta Borodkinin kuvie. Käsikirjutukšen šivuissa on äijän huomautukšie šuomekši, kumpaset pitäy tutkie. Miun unelmana on tämän käsikirjutukšen julkaisu, šano Sofja Nikitina kokoukšešša.
Toisena teemana oli väjenlašennan tulokšet. Karjalan tietokeškukšen tietomieš, kielen, kirjallisuon ta istorijan instituutin istorijan ošašton johtaja Svetlana Jalovitsina šelitti tulokšie ta šano vähälukusen kanšan statukšešta, kumpasen karjalaiset voijah šuaha ta mimmosie jälkivaikutukšie še tuou.
Kalevalan ošakunta yhistäy Kalevalan piiristä kotosin olijie ihmisie, kumpaset šiirryttih elämäh Petroskoih ta tahotah vaikuttua kulttuurin, istorijan ta kielen šäilyttämiseh. Nykyjäh ošakuntah kuuluu yli 45 ihmistä.
