Kalevalan kantelešoittajien kanšanyhtyveh täytty 50 vuotta. Vuotisjuhlalla oli omissettu šuuri konsertti ta valokuvanäyttely.
Konsertti piettih 19. kevätkuuta Kalevalan kulttuuritalon lavalla. Šiinä esiinty Jurii Gladiševin johtaman yhtyvehen nykyset šoittajat ta piäštökkähät.
— Päivänšankari – kantelistien yhtyveh šoitti konsertilla kymmenen musiikkinumeruo. Joukošša nyt on 15 musikanttie. Vielä konsertissa esiinty miun johtama kanteleharraštajien joukko, kumpasešša niise on 15 henkie ta kumpaset šoitetah viisikielistä kannelta. Konsertin vierahana oli yhtyvehen piäštökäš ta entini johtaja Ivan Kieleväini, hiän šoitti solonumeron, kerto kanšanyhtevehen johtaja Jurii Gladišev.
Yhtyvehen ohjelmašša oli kanšanmusiikkie, Sergei Stangridin ta Ivan Kieleväisen musiikkikapplehie, Jurii Gladiševin omie šävelmie. Konsertissa šai kuulla Jurii Aleksandrovičin šepittämyä lauluo Kalevalan runoilijan Andrei Tuomin runon šanoilla. Uuvvet numerot oikein tuntehellisešti vaikutetah kaččojih, kumpaset arvoššetah omamualaisien taituo ta ollah ylpiet kantelistien mäneššyksistä. Merkkipäivänä kulttuuritalon näyttämöltä kuulu äijän omamualaisien onnitteluja ta toivomukšie luovan kollektiivin nykysillä ošallistujilla ta niillä ihmisillä, ket eri vuosina oli šivottu elämän yhtyveheh.
— Konsertin lisäkši merkkipäivällä oli omissettu valokuvanäyttely. Myö keräsimä valokuvie etnokulttuurikeškukšen ta yhtyvehen šoittajien arhiivoista. Oli mukava kačella niitä ta muissella yhtyvehen istorijua. Laškoma, jotta koko istorijan aikana yhtyveh kašvatti noin šata musikanttie, lisäsi Jurii Gladišev.
Kalevalan kantelešoittajien yhtyvehen peruštajana oli Veikko Pällini. Vuuvvešta 1991 johtajana on ollun Karjalan kulttuurialan anšijoitunut ruataja, tašavallan Karjalan šielu -palkinnon šuaja, Veikko Pällisen opaštuja Jurii Aleksandrovič Gladišev.
Vuotena 1970 kollektiivilla oli myönnetty kanšanyhtyvehen kunnivoarvonimi. Šiitä alkuan kollektiivi tovistau korkieta statussie omilla kirkkahilla konserttiloilla, festivaliloih ošallistumisella, luovissa kilpailuissa voitoilla.