Kalevalafest-toimenpito piettih Tverissä Gor’killa nimitetyššä kirjaštošša. Tänä vuotena Kalevalalla omissettu tilaisuš oli pienempi, kuin viime vuotena, ka šiitä huolimatta še tuli mukavakši ta lämpimäkši.
— Ohjelmašša oli šeloššuš karjalan kielen tilantehešta, luovien ryhmien esitykšie. Tänä vuotena myö kuččuma esiintymäh nuorie, jotta hyö tuttavuššuttais karjalaiseh kulttuurih meijän festivalissa. Jokahini vieraš šai lukie lempirunuo avonaiseh mikrofonih, keškuššella vanhojen tuttavien ta yštävien kera, šano festivalin järještäjä Marina Jevgrafova.
Festivalin kallehena vierahana oli Dmitrii Harakka-Zaitsev, hiän kerto inkeröisistä ta vietti inkeröistanššien muasteri-opin.
Lisäksi festivalissa oli esitetty Kurčin-Murčin-työpajan toiminta.
— Myö esittimä kankašpuilla kuvottuja tuottehie ta kuvotušta kankahašta luajittuja vehkehie, merkattuja tavaroja ta keramikkua. Näyttelyn lisäkši pitimä kuvonnan muasteri-oppie ta näyttimä, kuin merkata. Tahon vielä lisätä, jotta festivali yhisti äijän tuttavie ta yštävie ta oli oikein lämmin ilmapiiri, kerto Kurčin-Murčin -työpajan käsityömuasteri, kutoja Tatjana Žil’tsova.
Tverissä Kalevala-eepossalla omissettuja toimenpitoja pietäh perintehellisešti vuuvvešta 2013, šilloin oli Kalevala-teemasie spektaklija. Vuuvvešta 2021 tapahtuma šuureni festivaliksi.
Tänä vuotena tapahtuma yhisti 150 ihmistä.