Kalages tehtas uz’ sport- da vändsija lapsiden täht
Necil vodel sijaline kundaližen ičenaižen valdelimen (Tos:an) tugen programmale om anttud 68,5 mln rublad valdkundan b’udžetaspäi. Vodel 2021 rahatugen saba 97 TOS:ad, miččed om tehtud vodel 2020, eloho todenzoittas 205 projektad, miččed oma oigetud külän socialižehe kehitoitusehe.
Vägestajiden keskes om Änižröunan Kalagen külän ”Pihläine”-TOS. Teravas Kalages tehtas sport- da vändsija lapsiden täht. Se linneb külän keskuses, läz kul’turpertid. Radod jo zavodihe. Aktvižesti abutaba külän eläjad da sijaližed kivisaskelmižed predprijatijad.
— Sijad puhtastadihe penzhišpäi, todihe otsevad, tazotadihe pind traktoran abul. Sjaližed eläjad kaiken oma vaumhed tulda abuhu, nece om hüvä, ved’ mö tegem ühthižen suren azjan külän täht, miše meiden lapsile oliži kus mänetada aigad, väta, sanub projektan tomotai Maria Mironova.
Kalages eläb äi norid kanzoid lapsidenke. Nügüdläižid vändsijoid lapsiden täht ei täudu. Külän eläjad oma täudeližed, miše nügüd’ kaikuččel lapsel linneb voimuz sportata, väta da kehitoittas.
