Kalages praznuitihe professionaline praznik – Kaivajan päiv
Jäl’gmäižen elokun sobatan Kalages mäni professionaline praznik – Kaivajan päiv. Se kerazi ühthe kivisaskelmižiden karjeroiden radnikoid da pämehid, eläjid da adivoid susedkülišpäi.
Tradicijan mödhe Kalagen eläjad ühtes külän pämehenke paniba vencan vodel 1939 kolijoiden kaivajiden kaumale. Jäl’ges praznikan päpala mäni Änižen randal, “Kalarand”-etnoparkas. Karjeroiden pämehed sanuiba ozatelendsanoid da pauklahjoičiba parahimid radnikoid. Kaivajiden täht oli tehtud voibud, hö ozutiba ičeze mahtoid erazvuiččel tehnikal. A rindal mäni minijaugmäčvänd. Parahimile joukuile da mastarile anttihe lahjoid, medalid da kitändkirjeižid.
— Kaivajan radmaht tämbei om popul’arine meiden külänikoiden keskes. Äjiš kanzoiš oma kogonaižed kaivanikoiden dinastijad, mahtišt anttas polvespäi toižele. Nece om lujas jüged rad. Ozatelen kivisaskelmižen kompleksan radnikoid, veteranoid, kanzoid, miččiš kaitas kiviazjan tradicijoid i toivotan kaikile vahvad tervhut, satusid da kaiked hüväd, sanui ičeze Vkontakte-lehtpolel Grigorii Šemet.
Praznik jatksihe ehtal. Külänikoiden täht oli tehtud koncert, lämoišou da diskotek.
— Praznik oli čoma. Pidab tugeta mugoižid tradicijoid küläs. Necil vodel ei olend muga äi rahvast, no kaik oliba hüviš meliš. Sä oli läm’, oli äi magukahid vepsläižid sömižid, lapsiden täht oli tehtud äi ilotusid, a ehtal kaik kerazihe kanzoil, lapsidenke. Oli lujas läm’ sebrakaz il’mišt, sanui Kalagen školan pämez’ Svetlana Gotič.
Johtutam, Kalages amusai sadas gabbro-diabazad, külä om tetab ičeze mastaril-kaivajil. Täs, vepsläižes küläs, om surembad gabbro-diabazan varad.
Tarkištele "Oma Median" MAX-kanalad!
