Kalages ozateldihe kaivajid professionaližen praznikanke
Tradicijan mödhe jäl’gmäižen elokun sobatan Kalages praznuitihe Kavajan päiväd, mitte mäni Änižen randal ”Kalarand”-etnoparkas. Praznikan augotišes pauklahjoitihe parahimid karjeroiden radnikoid, a jäl’ges mäni koncertprogramm külän eläjiden täht.
— Kalag’ om kaivajiden külä. Om hüvä, miše joga voden tehtas mugoine čoma praznik. Kaivajan päiv tuli jo hüväks tradicijaks meiden küläs. Sil sanudas ristituiden sabustusiš, karjeroiden radnikad ozutaba mastarut konkursoiš, rahvaz lebaitase da iloitese. Toivotan kaikile tervhut, mirud da kaiked hüväd, sanub Kalagen külän eläi Konstantin Saveljev.
Praznikan aigan mäni minijaugmäčvänd karjeroiden sebroiden keskes, a rindal kaivandmašinoiden radnikad ozutiba ičeze mastarut.
Kaikile adivoile löuzihe azj. Oli midä tehta lapsile-ki. Heiden täht tehtihe erine melentartuine programm: batutad, čibud, konkursad, vändod, hebod.
