Kalages mäneba tradicionaližed suks’voibištelendad
Necen pätničan, 14. uhokud, Kalages mäneba suks’voibištelendad, miččed tehtas Sovetskijan Sojuzan Gerojan Anna Lisicinan muštoks.
— Kut kaiken-ki, meidennoks tuleba lapsed da aigvoččed susedkülišpäi: Šokš-, Šoutjärv’-, Derev’anka- da Zaozerje -külišpäi. Varastam enamba 100 ühtnikad. Hihtäjad voibištelesoiš eri-igäižiš gpuppiš: 1.-4. klassoiden, 5.-6. klassoiden, 7.-9. klassoiden da 10.-11. klassoiden openikad i aigvoččed. Ühtnikoile tarjoitas hihtta suksil 500-metran, 1200-metran da 2000-metran piččed matkad, sanub Kalagen školan pämez’ Svetlana Gotič.
Voibuiden ezmäižen, toižen da koumanden sijoiden vägestajad kaikuččes igägruppas saba pauklahjad.
Suks’voibištelendan tradicii eläb Kalages vodelpäi 1972. Ende voibištelendoihe ühtniba vaiše aigvoččed. Nügüd’ nece azjtego ühtenzoitab erazvuiččid sugupol’vid.
Voibištelendoiden tegijad oma Kalagen eländtahon administracii, Änižröunan administracii, Kalagen škol.
