Kalages mäneba suks’voibud Anna Lisicina muštoks
Pätničan, 20. uhokud, 12:00 časud Kalages zavodisoiš tradicionaližed suks’voibud, miččed om omištadud Sovetskijan Sojuzan Gerojale Anna Lisicinale. Tegijoiden sanoiden mödhe, om vaumištadud kaks’ suks’ladud — penile lapsile da 5.—11. klassoiden openikoile i aigvoččile.
— Täl vodel linneb läz 125 ühtnikad, ku lugeda Kalagen školan opendajid. Kut i tobjimalaz, meidennoks tuleba hihtäjad Šokš- da Šoutjärv’ -külišpäi, a mugažo varastam adivoid Derev’anka- i Ladva-Vetka -külišpäi. Om žal’, miše Zaozerjespäi niken ei tule — sigä oli karantin, — no tobjimalaz sen eläjad ühtneba meiden suks’voibuihe, sanub “Oma Media” -portalale Kalagen školan pämez’ Svetlana Gotič.
Voibuiden tegijad toivotaba čoman da praznikaližen azjtegon, miččen aigan kaikil linneb voimuz kundelta sijaližen naižiden fol’klorkollektivan ezitusen — naižed pajataba pajon Sovetskijan Sojuzan Gerojan Anna Lisicinan polhe. Sportpraznikale om kuctud uden Kul’turpertin radnikad, mugažo voibuihe ühtneb Šokšun pämez’ Viktoria Antonova. Tegijad spasiboičeba professionališt sportmest Vladimir Vigelinad, kudamb abuti tehta suks’ladud.
Kaik voibuiden ühtnikad saba čomad muštlahjad da diplomad.
Täl vodel tradicionaližed suks’voibud Anna Lisicinan muštoks tehtas jo 54. kerdan. Vodel 2025 Kalages radaškanzi Anna Lisicinan muzei.
Suks’voibud tegeb Kalagen škol Änižröunan administracijan da Kalagen eländtahon administracijan rahatugel.
Tarkištele "Oma Median" Telegram-kanalad!
