Kalagen kul’turpert’ kaiken oli külän südäimen, kul’turelon keskusen, sijan, kus vedetihe erazvuiččid praznikoid da vastusid lapsiden i aigvoččiden täht. Jo äi vozid täs ei pidetud nimiččid azjtegoid. Kul’turpertiš hätken ei olend katusen kohendust, katuz zavodi pästta vet. Muloi Kalagen kul’turpertin kohendusele valdkundan büdžetaspäi oli anttud 5,5 millionad rubl’ad. Kohenduz zavodihe muloi redukus.
— Tämbeižeks päiväks kul’turpertiš mäneba sured radod, kattas uz’ katuz, sauvotuses om jo kuiv. Jäl’ges tehtas kohenduz pertin südäimes. Ku kaik mäneb hüvin, elokus linneb kul’turpertin avaiduz. Necidä varastaba kaik külän eläjad, nece kohenduz andab voimusen pideta erazvuiččid azjtegoid sures kacundzalas. Nügüd’ mö vaumičemoi Vägestusen päiväks, puhtastam sijad läz kul’turpertid, abutaba kaik: eläjad, openikad, karjerad, sanub kul’turpertin pämez’ L’udmila Lazareva.
Johtutam, Kalagen kul’turpertin sauvotusele om 90 vot. Äjak-se vot tagaze täs tehtihe lämbituz, kanalizacii, vajehtadihe elektrolangišt i iknad, tehtihe kohenduz sportzalas.