Kalagen škol sab vähäluguižen statusan
Äjiš külänškoliš partan taga kaikuččes klassas ištub 5-10 openikad. Rahoitusen polespäi nece ei to ližat. No küläd, kus ei linne školid, koleba. Necil openduzvodel Kalagen školale, kus opetas vepsän kel’t, anttas vähäluguižen status. Tämbei Kalagen školas opendase 58 openikad, niišpäi 10 openikad tuliba ezmäižehe klassaha.
— Mugošt lapsiden otandad školha amu ei olend, tämbei nece om kaikid suremb klass školas. Tämbeižeks päiväks opendajad oma kaik, lapsid školha vededas avtobusal, radhonusiš om kaik tarbhaine kaludišt, om osttud openduzkirjad. Radam i sam uzid tedoid. A udes školan statuses mö em nägoi nimidä pahad, valdkund tugeb meid, nece om lujas hüvä, sanub Kalagen školan pämez’ Svetlana Gotič.
Uz’ openduzvoz’ zavodihe, planoid om äi. Edel om Regionankeskeine festival’ “Vepsläine sarn”, mittušt lujas varastadas Kalages.
