Kalagen kul’turpertiš om loptud kaik päradod kahten subsidijan mödhe, miččid anttihe vodel 2021. Om kohetud katuz, sportzal, sur’ zal da radhonuz. Kaiken kohendusele oli anttud Karjalan valdkundan b’udžetaspäi 11 mln rubl’ad.
— Tämbeižeks päiväks ei ole tehtud varumatomuden pasport, sikš em voigoi avaita kul’turpertid oficialižesti. Mugažo ei ole kohetud kinozal. Necen täht pidab sured rahavarad. Tämbei om jo oigetud pakičuz Venäman Kul’turministerstvaha. Karjalan pämehen käskön mödhe om tehtud kaik, miše anttaižihe rahoid kohendusele, sanui Kalagen külän administracijan pämez’ Mihail Pol’akov.
Äi vot kul’turpert’ ei radand. Kalagen eläjad lujas tusttuiba praznikoid, azjtegoid kul’turpertiš.
— Nadeimoiš, miše uhokun augotišes kul’turpert’ avaidab ičeze verajad külän eläjiden täht i mö voim vedäda sigä praznikoid. Rahvaz pakičeb avaita sportzal, tahtnikoid om äi, sanui kul’turpertin pämez’ L’udmila B’erkhaldt.
Ezmäižen kerdan Udeks vodeks kul’turpertinno om pandud i čomitadud sur’ kuz’, mitte ihastoitab eläjid. Sanudas, nügüd’ muga linneb joga voden.