Necil vodel Vepsän kul’tursebr tegeb projektan “Elomatk läbi aigas”. Necen projektan aigan Kalagen etnokeskuses “Värtin” mäneba muzikurokad tetaban vepsläižen muzikantan Jevgenii Fotejevan ohjandajal. Urokoile tuleba Kalagen školan openikad. Hö opendasoiš kundelmaha ritmad, vändmaha muzikvändimil, tundištasoiš muzikprogrammoidenke i eskai iče probuiba kirjutada muzikad. Mugažo urokoil pagištas siš, kut kirjutada runoid da pajoid.
– Külälaižil lapsil ei ole ližasebroid školan jäl’ghe i nece om hüvä, miše nügüd’ heil om voimuz tulda muzikurokoile, rata muzikstudijas. Nece om tärged lapsiden täht. Nadeimoiš, miše muzikurokad jatktasoiš tulebal-ki vodel, sanub Vepsän kul’tursebran pämez’ Larisa Čirkova.
Muzikurokad mäneba Kalagen etnokeskuses kerdan nedališ Rahvahaližen da regionaližen politikan ministerstvan tugele.