Kaksi karjalastu bloggerua puututtih federuallizeh projektah
On ilmoitettu Ministerstvo kontenta -programman tulokset. Rosiija — strana vozmožnostei -platforman TopBLOG-projektan kannatettuh programmah oli työtty 8 000 ilmoitustu. Nerokkahimat 600 hengie jatketah opastustu programmas. Niilöin luvus kaksi hengie Karjalaspäi. Mollembat — Ol’ga Remšu da Anna Anhimova — ruvetah opastumah Kul’tuuru da taido -alal.
Petroskoilaine Anna Anhimova, Kižin muzein ruadai on todevuttanuh piäl 30 projektua. Omassah bolgas häi kirjuttau karjalazien, vepsäläzien da ven’alazien elaigah nähte.
Kostamukselaine Ol’ga Remšu on karjalan kul’tuuran Viena-seuran piälikkö omassah blogas sanelou karjalazien perindölöis, kirjuttau projektois da tapahtumis, kudamih iče yhtyy.
— Tänä vuon rohkenin oppie uuttu opastustu, tahton luadie mediaprojektu. Valličin Kul’tuuru da taido -alan, sendäh ku johtan Viena-seurua da olen varmu, ku pidäy säilyttiä Karjalas eläjän kandurahvahan kul’tuurua da perindölöi. Media-ala auttau sit ruavos, tahton opastuo käyttämäh sidä muga, ku meijän tavat da perindöt roittas kuulužembat da mieldykiinnittävembät niilöih nähte, kenele kirjutan. Opastundas suaduloi tiedoloi rubien sanelemah kollegoile, ystävile, tuttavile, sanoi Oma Mediale Ol’ga Remšu.
Nygöi karjalazet naizet opastutah loittuopäi kuulužimien media-alan ekspertoin piän al Senež-haldivoruadopajas, kačotah vebinaroi da täytetäh käskiettylöi ruadoloi. Ielleh algavuu ruado joukolleh, lopus rodieu mediaprojektan ezittämine.
Opastundan jälles programman parahat loppenuot suajah mahton jatkua yhtehisty ruaduo valdivoelimien kel da kehittiä tärgielöi sotsialuprojektoi federuallizel tazol.
Yhtyö projektah voijah kontentan luadijat igäh da eländykohtah huolimata andamal ilmoitus saital.
Aihies voit lugie suomeksegi.
