Kaks’ ut turistmatkad tehtas Karjalas
Karjalas kehitoittas kaks’ ut’ rahvahališt turistmatkad, miččed ühtenzoitaba meiden valdkundad toižiden Venäman regionoidenke. Sen polhe starinoiči Artur Parfenčikov “Jedinaja Rossia” -partijan azjtegol, mitte oli omištadud Venäman turizman kehitoitusele, tedotab Karjalan Pämehen press-služb.
Ezmäine projekt om “Sur’ Venäman pohjoine matk” — se ühtenzoitab 12 regionad Moskvaspäi Soloveckijoihe sarihesai. Karjalas nece matk mäneb pidust’ Änižen da Ladogan järvid, Petroskoin, Kiži-saren da vanhoiden pühäkodiden kal’t. Turistmatkaha mülüba Moskva, Tverin oblast’, Jaroslavl’, Vologda, Velikii Ust’ug, Arhangel’sk, Karjala da Soloveckii monastir’. “Sur’ Venäman pohjoine matk” ozutab Pohjoižen äipoližut da čomut, mel’dütoitab turistoid i abutab regionoiden kehitoituses.
Toine projekt, “Änižen matk”, todenzoittas ühtes Vologdan da Piterin agjoidenke. Turistoil linneb voimuz kävuda “Kiži”-muzejaha, kacta Änižen kal’l’pirdatusid da ajelta Petroskoihe.
— Necen projektan abul tehtas ühthine turistine taho, Äniž-Ladogan taho, kus jogahine region ozutab ičeze ičeladušt kul’turad, tradicionaližid radmahtoid da londusen erigoičusid. Planuitas, miše turistmatk tehtas vaumheks jo vodel 2026, sanui Artur Parfenčikov.
Karjalan Pämehen sanoiden mödhe, turizm Karjalas kehitoitase ani heredas: voden 2025 vilukuspäi redukuhusai meiden valdkundaha kävui 44 % enamba turistoid, mi kävui männuden voden sil-žo aigal. Vodeks 2030 planuitas ližata turistoiden lugumär, sauda adivpertid da ösijoid, a mugažo sada völ enamba rahoitust.
Uzišt neciš temas voib lugeda mugažo suomeks.
Tarkištele "Oma Median" Telegram-kanalad!
