Viktorija Gurtova: Kaivospiälikön kodi kohendetah
Petroskoin vahnimii rakenduksii olii kaivospiälikkö Gaskoinan kodi paloi 5. kevätkuudu. Spetsialistoin sanoin mugah se suau kohendua. Kohendusruadoloin projektu muutetah, koin jiännökset konserviiruijah.
Tulipalon jälles spetsialistat vie arvostetah menetyksii. Kohendusruadoloi objektal pidi Legion-kompuanii, kudual on suurdu kogemustu täl alal. Firman ruadajat kohendettih Tverin gimnuazien, Kostroman politsiihaldivon histouriellizen rakenduksen, Voronežan muuzikkuopiston, Jaroslavl’an Jumalan kirkastuksen manasterin keljat.
Vuvvennu 2026 Legion oli suannuh 63 miljounua rubl’ua mennytvuodehizis ruadolois, kudamis enimät säilyttih tulipalon aigah. Endizelleh seizotah ainavoluaduzet erkerikkunat da lattiet, kudamii vuvvennu 2025 kohendettih Jaroslavl’an ruadopajois. Koskemattah jäigi piälystys — lavvat riičittih kohendusruadoloi pidäjes.
— Tärgei on, ku rakendus säilyi. Sit on puurakendus keskes da kaksi kivifliigel’ua bokis. Mollembat tulispalos säilyttih, paloi toine kerros da levo. Enzimäine ruado on luadie avuarienvastazien da konservatsiiruadoloin projektu. Mustomerki rodieu kohendettu da linnu suau sen endizenny, sanoi Karjalan piämiehen lehtistöpalvelule Viktorija Gurtova, Karjalan tazavallan kul’tuuruperindön objektoin vardoičushaldivon piälikkö.
Kohendusruadoloin aigah objektas vastuau kohendusruadoloi piettävy laitos. Karjalan tazavallan kul’tuuruperindön objektoin vardoičushaldivon spetsialistat valvottih kohendusruadoloi joga päiviä.
Tulipalon menetykset korvuau kohendusruadoloi pidänyh laitos kaičusmakson varois libo omis den’gois, konzu sellitetäh, min periä sytyi tuli.
Yhty Oman Median kanualah Telegramas!
