Kaivanikad ozutiba ičeze mastarut praznikal
Amussai Kalagen külä om tetab kivel. Nügüd’ sid’ radab kahesa kivisaskelišt karjerad. Tämbei kaivanikoid ozateldihe heiden professionaližen praznikanke.
Kaikuččen voden Kalages praznuitas Kaivajan päiv. Nece om jo čoma tradicii küläs. Se pidetas elokun jäl’gmäžen sobatan “Kalarand”-etnoparkas. Täl vodel kacmata vihmuhu i viluhu säha praznikale tuli äi rahvast. Kaivanikoid ozateldihe pofessionaližen praznikanke, spasiboičiba rados da tedomahtos.
— Kaikuččen voden kanzanke tulem praznikale. Programm om melentartuine kut aigvoččiden, muga lapsiden-ki täht. Minun kanzas kaik mužikad radoiba i radaba karjeras, saba kived. Nece om lujas jüged rad. Kaikile kivenradnikoile toivotan kovad tervhut da satusid rados, sanub Kalagen eläi Maria Mironova.
Praznikan programmaha mülüiba mastaruden konkursad kaivanikoiden keskes, jaugmäčvänd karjeroiden joukuiden keskes, muzikprogramm. Ičeze mastarut ozutiba kranan, kaivanmašinan da samosvaloiden vedäjad, svarščikad da burilščikad. Vägestajad kaikuččes konkursas saiba lahjoid da kitändkirjeižid.
