Külän eläjad andaba harvinaižid vepsläižid tradicijoid lapsile da norile
Kezapästusen aigan vepsläižiden Änižröunan školiden openikoiden täht vedetihe mastar’-klassoid. Niiden aigan vepsläižiden küliden rauhad eläjad, vepsän kelen da kul’turan tundijad ozutiba lapsile harvinaižid radoid, miččed om unohtadud jo äjiš posadoiš.
— Spasib kaikile küliden eläjile, kudambad jagoihe lapsidenke ičeze tedoil. Mö lapsidenke openzimoiš kudomaha hurstid, tehmaha tauknad, panda varha nin’t, nece tradicii jo lähteb elospäi. Nügüd’ lapsed tedaba vepsläižen lemen peitusen i iče voiba keittä sidä. Oli jüged löuta mustan kül’betin. No meile ozastui löuta mugoine kül’bet’ i ozutada lapsile, kut se läbmitadas. Mö nägim, miše lapsile kaik nece om melentartušt, meile om tärged kaita todesižid vepsläižid tradicijoid i antta niid toižile sugupol’vile, sanub projektan ohjandai Larisa Čirkova.
Kaik mastar’-klassad kuvatihe kamerale, teravas videorolikad subtitroidenke venän kelel voib kacta Internetas.
Mastar’-klassoid tehtihe ”Kel’ — minun Kodima”-projektan aigan Karjalan pämehen grantan rahatugele.
Uzištoid neciš temas voib lugeda mugažo venäks.
