Jyškyjärven kylä täyttäy 440 vuottu
Kalevalan lohkon Jyškyjärven 440-vuozipäiväkse kyläs 25.—26. kezäkuudu pietäh pruazniekku. Pivon enzimäzekse päiväkse kalevalalazet valmistetah karjalankieline ozutelmu ”Uškokkua tahi elkyö, vain näin se oli”, ruadopajat lapsih nähte.
Pruazniekan tossu piän rubieu ruadamah kyläjarmanku, ozutetah konsertu, kuduah yhtytäh paikallizet ”nimipäivyniekat” folklourujoukko ”Tuomi”, pajojoukko ”Nadežda” da tansijoukko ”Kalina” da kostamukselazet pajojoukot — ”Viena”, ”Hete”, da uuzi ”Tuulitar”. Pruazniekakse valmistetahgi karjalazien syömizien auktsion. Ildupäiväl pietäh perindölline Jyškyjärven reguattu.
— Tänä vuon reguatan aihiekse on otettu ”Laukkurit”. Sih yhtytäh paikallizet rahvas da tulolazet Vuokkiniemel, Murmanskas da Kostamuksespäi. Rodieu yheksä kilbujoukkuo da kolme ajovuoruo. Täl kerdua meil löydyi sponsoru, kudai lahjoittau reguatan voittajale venehmouttoran, sanoi Oma Mediale Marija Mitina, pruazniekan valmistusjoukkoh kuului.
Reguatan jälles pidoh tulluzile taritah kalaliendy, čuajuu, marjuvetty da magieloi syömizii. Lopus karjalazien tavan mugah rodieu yhtehine kruugu.
