Junal Karhumäin nähtävyksii kaččomah
Petroskoin da Karhumäin välil rubieu ajelemah juna. Karjalan eläjät da tazavaldah tulluot suajah piästä junal Karhumäin kauti Kižin suarele da Oniegan niemimuale, nähtä sidä kohtua, kus kuvattih kuulužua Rakkahus da kyyhköit -kinuo, sego kävvä gastroturizman tundiettuloih kohtih. Maršrutan eräs tärgei kohtu rodieu endine Mannergeiman lujoitusliinii Karhumäin linnas.
Uvven junan ajelemizeh niškoi sovittih Karjalan piämies Artur Parfenčikov da RŽD-kompanien piämies Dmitrii Pegov. Tazavallan piämiehen mielen mugah uuzi maršruttu levendäy Karjalan turistukartan rajoi da hyvin vaikuttau Karhumäin piirin kehitykseh: tiä rodieu uuttu ruadokohtua paikallizile eläjile uuzil turistuobjektoilgi. Juna rubieu ajelemah jo tänä kezän.
Uuttu turistumaršrutua šeikuimas oldihgi Karhumäin piirin piämies Aleksandr Fedotov da Kižin muzei piälikkö Jelena Bogdanova.
— Kižin muzei jälgimäzien vuozien aigah on kingies yhtehizes ruavos RŽD-laitoksen kel. Pagin on sen jatkamizes. Dmitrii Pegov jo oli käymäs Kižis. Täl kerdua häi tuli suarele ei vaigu paginua pidämäh, häi iče tahtoi koitella uvven maršrutan logistiekkua, ilmoittau Kižin muzei omassah VK-sivul.
Karjalan junamaršrutat ollah kuulužat da kyzyttävät. Ruskealan ekspress oli pandu rattahile 1. kezäkuudu 2019 da sit päiväs ajoi jo enämbän 300 tuhattu kilometrii Sordavalan da Ruskealan mägipuuston välil da ehätti 1, 5 miljounua ristikanzua.
Yhty Oman Median kanualah MAX:as!
