Jugra: suomelas-ugrilazet kirjuttajat kerävytäh yhteh
Hanti-Mansiiskois avtonoumizes alovehes 19.—23. oraskuudu pietäh Suomelas-ugrilazien kirjuttajien konferensii. Suureh pidoh kerävyy paikallistu da tulolastu rahvastu Kudimkaras, Petroskois, Iževskas, Saranskas, Siktivkaras, Kemerovos, Krasnojarskas, Ufas, Moskovas, Sankt-Peterburgas, Surgutas, Joškar-Olas da muijalpäi.
Suures istundos paiči toizii ezityksii suau kuulta Zinaida Strogal’ščikovan paginan "Vepsäläzen kirjalližuon 35 vuottu: Aberis literatuurutaidojulgavoh suate” da Natalja Čikinan ezityksen ”Karjalan literatuuru karjalan da vepsän kielil”.
Pivon hantuzis pietäh ruadopaja alguajih suomelas-ugrilazih kirjuttajih da nuorih dramaturgoih nähte, ”pöyryžis stolis” pietäh paginua pohjazes eläjien kanzoin kielien da kul’tuuran säilyttämizes da suomelas-ugrilazil kielil painettulois kirjois.
— Rubien sanelemah Periodika-julguamon ruavos, kerale on otettu meijän painettuu kirjua karjalan, vepsän, suomen da ven’an kielil. Himoittas kaččuo da kuulta, midä kolleegat ruatah toizis suomelas-ugrilazis subjektois da Ven’an suuris linnois, sanoi Oma Mediale Natalja Sinitskaja.
Konferensien loppupäivinny pidoh tulluzil rodieu mahto kävvä Urai-linnah da Meždurečenskii-kyläh, sego Silavi-etnopuustoh.
Suuren pivon valmistajinnu ollah Hanti-Mansiiskoin alovehen – Jugran haldivo, JUNESKO:n azieloi valvoi Ven’an federatsien komiissii, Pohjaisalovehien kanzoinväline liitto ”Pohjaine fourumu” da Kanzalližuksien azieloin federualline agentstvu.
