“Jubilejaspäi jubilejaha”: praznik Šoutjärven školas
30. vilukud Šoutjärves praznuitihe sen keskškolan 220-voččen jubilejan. Kut i toižil Änižröunan školil, znamasine päivmär oli jo vodel 2025, no Šoutjärves praznik sirttihe möhembaks.
Ozatelmaha vanhad školad tuliba opendajad da openikad, sebranikad, adivod toižiš külišpäi, valdmehed, “Vepsän kul’tursebran” ühtnikad, Karjalan rahvahaližen i regionaližen politikan ministerstvan ezitajad, joukvestišton radnikad.
Adivoiden täht oli vaumištadud čoma da vessel praznikaline koncert, miččen nimi oli “Jubilejaspäi jubilejaha”. Sihe ühtniba Šoutjärven školan openikad da opendajad: scenal lugetihe runoid i ozatelendsanoid, pajatadihe pajoid, kargaitihe, johtutadihe tetabid školan radnikoid da pästnikoid. Koncertprogramman abul voi tundištadas školan istorijanke i erigoičusidenke.
— Mö naprim kaita školan bohatad istorijad da jäl’gestust, muštam sen enččid radnikoid. Meiden škol om ani nügüd’aigaine, täga todenzoittas äi erazvuiččid projektoid. Lapsed oma melekahad — jogahižel vodel škol pästab medalistoid, kudambad päzuba opendamhas hüvihe universitetoihe. Erased heišpäi pördase Šoutjärvehe, radaba täga opendajin, sanui Natalia Bikova, Šoutjärven školan pämez’.
Joudajan aigan školas voib kehitoittas sädandrados: sigä radab savespäi täputandan sebr, kus openikad tegeba čomid tehmusid da bobaižid Kalagen savespäi, — se ližadab lapsiden melentartust rahvahaližehe kul’turaha da udessündutab vanhoid tradicijoid. Mugažo školas oma pirdand-, muzik- da sportsebrad.
— 1980-vozil meiden školan polhe sanutihe, miše sil om ičeze mod: kazvatuz, estetik da rad. Olen mugošt-žo mel’t: mö kazvatam ristituid, kudambad armastaba kodimad, kodikel’t da nägeba i arvostaba Änižröunan čomut. Nece kaik andab hüvän satusen. Kaikel südäimel armastan meiden školad, ližazi Natalia.
— Radan täs školas jo 11 vot, lujas navedin ičein radod, armastan kaikid lapsid. Nece om parahim rad: meil oma parahimad opendajad i openikad. Kaiken aigan tahtoin rata vepsän kelenke i olen ihastusiš, miše školas voin pagišta openikoidenke vepsäks. Kaikuččen päivän mänen radho hüviš meliš, sanui Anastasia Jevtušenko, Šoutjärven školan vepsän kelen opendai.
Vodel 2025, jubileivodel, Šoutjärven školas mäniba praznikaližed azjtegod: openikoiden konferencijad, oppindradod. Siloi udištihe školmuzejan keradamišt. Täl vodel školas planuitas vedäda “Pajokeraine” -festival’, miččele tuleba ühtnikad Karjalaspäi, Piterin da Vologdan agjoišpäi.
Nügüd’ Šoutjärven školas opendase 96 openikad da 47 kazvanikad, sikš ku sigä om tehtud lapsiden päivkodi-ki.
Tarkištele "Oma Median" Telegram-kanalad!
