Jokahini šai tuntie Kotimuan voimua
Melkein vuosi keštänyt Kotimuan voima -projekti piäsi loppuh. Arhippa Perttusen šiätijön ta Viena-šeuran toteuttamat tilaisuot oli omissettu Vienan Karjalan kulttuurin, kielen ta tapojen šäilyttämiseh.
Kotimuan voima -projekti šai Karjalan piämiehen granttien fondin rahotukšen šen tapahtumien toteuttamiseh tänä vuotena.
— Tämä oli meijän šuurin projekti. Šiih kuulu šeiččemen ošua, muutoma kymmenen tapahtumua, kumpasien järještämiseh ošallistu koko Viena-šeura ta šen partn’orit ta yheššä lašettuna projektin toiminta koški varmašti yli tuhatta ihmistä, šekä myö šaima uušie jäšenie šeurah, šano projektin johtaja Julija Filippova.
Lämpimäššä ilmapiirissä piettih projektin ošallistujien loppuvaštautumini, missä oli kerrottu kaikista tapahtumista.
Kotimuan voima -projektin ošua oli šeiččemen: Karjalaisen käsityön ta kulttuurin muasteri-oppien ta seminarien vetämini; Kiestinkin šeuvun kertomušperinnehtä -kokomukšen valmistamini; Orvokki-kuklateatterin toiminnan kannatuš; Karjalan keškiajan naispuvun kurššin järještämini; Kantelen muistomerkin luatimini ta ašettamini Vuokkiniemeššä; VienaCamp-opaššuškentän pitämini ta Pirttilahen pruasniekan vetämini; Ošallistumini perintehellisih pruasniekkoih Vienan runonlaulajien kylissä.
— Oli mukava vaštautuo lopputilaisuošša ta tuaš muissella šitä šuurta ruatuo, mi oli tehty. Viena-šeura ruatau šemmoista työtä, kummaista ei riitä toisissa piirilöissä. Heilä on toimija joukko ta še ošuau toteuttua omie idejoja, šano Viena-šeuran jäšen Tatjana Tupina.
Koštamukšen kaupunkipiirissä oli pietty eriluatusie tilaisukšie eri-ikäsillä ihmisillä. Niijen ošallistujina oltih paikalliset eläjät šekä šeuvun vierahat ta jokahini heistä voipi tuntie Kotimuan voimua.
