Jessoilas azetettih runonpajattajile omistettu mustolaudu.
Se valmistettih Petroskois Melanja Peskovan Vladimir da Jevgenija -bunukoin kannatuksel. Mustolavvan avajazis piettih konsertu, kuduah yhtyi pajojoukkoloi Jessoilas da Karjalan eri čuppuloispäi.
– Idei valmistua mustolaudu tuli mieleh Jessoilan aktivistale, Karjalan Rahvahan Liiton Jessoilan ozaston piälimäzele Galina Vasiljevale. Ezmäi laudu tahtottih omistua vaiku Melanja Peskovale, ga sit piätettih kirjuttua vie Siämärven čupun 12 runonpajattajan nimie, saneli paikalline aktivistu Tamara Sergejeva.
Keriämäh tiedoloi Siämärven čupun runonpajattajis rubei juuri Tamara Sergejeva. Häi kiändyi Karjalan tiedokeskuksen Kielen, literatuuran da histourien insituutan ruadajien puoleh, kuduat annettih iänitykset. Arhiivas löydyigi Melanjan fotokuva.