Jessoilas azetettih mustolaudu Aleksandr Volkovale
Mustolaudu azetettih Aleksandr Volkovan koin oččuseinäh. Täs kois Jessoilan kyläs Siämärven rannal rodivui da eli runoilii. Mostolavvan avajazih tuli runoilijan omahizii, dovariššoi, omamualazii, gostii lähikylis da Petroskoispäi.
– Tämän mustolavvan avajazet on tozi hyvä merkipäivy. Aleksandr Lukič rouno ku kaččou omas ikkunaspäi omah kyläh, järveh, omamualazih. Minä kiitän kaikkii, kenen hyvyös tämä mustolaudu rodih täs, sanoi Jessoilan kyläkunnan piälikkö Andrei Orehanov.
Aleksandr Lukič eli pitkän igäpalan, piäzi kaikis vaigevuksis läbi, maltoi eliä jygiel aijal, jätti hyvän jällen meijän muale. Hänel oli äijy uskottavua dovariššua. Mennyt pyhänpiän hänen mustolavvan avajazis kuului hänen runoloih kirjutettuloi pajoloi, lämmii sanoi da mustelmii, hänen omahizien kiitändysanoi kaikkien tulluzien puoleh.
Aleksandr Lukič Volkov rodivui vuvvennu 1928 Jessoilas. Omis runolois karjalan da ven’an kielel häi ihaili oman rannan čomuttu, saneli omas suvaičukses omah rahvahah da kieleh. Volkovan enzimäine runokogomus “Pieni Dessoilu” piäzi ilmah vuvvennu 1993. Vuvvennu 2013 Aleksandr Volkov sai Rahvahan kirjuttai -arvonimen. Kirjuttai siirdyi toizele ilmale tänävuon sulakuus.
Mustolaudu on azetettu Veškelyksen Oma tulehmo -liiton Karjalan Kylii myöten-projektan mugah. Projektan todevuttamizeh suadih varua Karjalan tazavallan piämiehes Grantas.
