”Järvidenkeskišton peitusid”: Petroskoiš ezitadihe tedomašinan vänd
Tal’vkun 19. päiväl Petroskoiš mäni ”Järvidenkeskišton peitusid” -vändon prezentacii, mitte om omištadud vepsläižile. Vodel 2025 vänd linneb pandud erazvuiččile vändplatformile.
— Vändos voib valita openduzrežim da opeta vepsän kel’t procesas, a voib muite väta kelen opendamata. Süžet om tehtud vepsläižen fol’kloran da sarnoiden pohjal, sanui prezentacijal vändon tegii Ruslan Nordinsen.
Vänd kožub kaikile kävutajile. Eskai niile, ken nikonz ei ole kulnu vepsän rahvahan polhe, no kenel om taht tundištadas vepsän kelenke da kul’turanke.
Vändon openduzrežim om interaktivine. Vändai opendaškandeb vepsän kel’t kosketades hengidenke. Openduzrežimas tariž opeta vepsän kel’t, miše sirttas edemba vändos.
— Mö naprim tehta interaktivižen vändon, miše nece ei olnuiži völ üks’ vepsän kelen openduzkirj. Meiden pätegendan om süveta vändajid süžetaha, tundištoitta vändon hengidenke, heiden veroidenke da elonmahtonke, ližazi Ruslan Nordinsen.
Tulijal aigal kehitoitajiden jouk planiruib levenzoitta vändon süžetad da ližata vändoho ut vepsän kelen vaihištod i uzid grammatižid konstrukcijoid. Mugažo joukun planoiš om tehta mugoine vänd karjalaižiden motivoiden mödhe, miččen abul voib opeta karjalan kel’t.
