Irma Mullonen – ”Tedo tehtas kollektival”
Karjalan Rahvahaližes muzejas mäni valdkundaližiden pauklahjoiden andmižen ceremonii parahimile tedon, kul’turan da taidehen radnikoile. Korktoiš sabustuiš da tegoiš Karjalan valdkundan da sen eläjiden täht professionaližes rados, istorialižen da kul’turižen jäl’gestusen kaičendan, kehitoitandan da popul’arizoitandan poles ” Arvtegoiš Karjalan valdkundan hüvüdeks” -medalil pauklahjoitihe Irma Mullonen — filologijan tedodoktor, Venäman tedoakademijan ühtnik-korrespondent, Venäman Tedoakademijan Karjalan Tedokeskusen Kelen, literaturan da istorijan institutan kel’tedon sektoran päradnik.
— Kaikutte mugoine pauklahj ei ole ühten mehen rad. Meletan, miše nece om tedomehiden erasiden sugupol’viden — minun opendajiden, minun kollegoiden da minun openikoiden — arvtego. Tedo tehtas kollektival, sanui Oma Media-portalale Irma Mullonen.
Karjalan Valdkundan pämez’ Artur Parfenčikov arvosteli Irma Mulložen äivottušt hüväd radod, hänen korktad professionalizmad da panendad tedon kehitoitandaha.
Irma Mullonen om tetab toponimist, baltianmeren suomalaižen kel’tedon, onomastikan, kel’kontaktoiden da etnolingvistikan specialist, opendai.
Mugažo Karjalan valdkundaližed lahjad saiba opendajad, tervhuz’radnikad, sauvojad da toižiden professijoiden ezitajad. Pauklahjoitud ristituiden lugetišes om 30 mest.
Uzištoid neciš temas voib lugeda mugažo karjalaks, suomeks da venäks.
