Irma Mullonen praznuičeb ičeze jubilejad
Tämbei, 29. vilukud, praznuičeb ičeze jubilejad Irma Ivanovna Mullonen — tetab kel’tedomez’, toponimišton tedai, Venäman Tedoakademijan ühtnik-korrespondent, filologian tedodoktor. Karjalan tedokeskusen kollektiv ozateleb Irma Ivanovnad da toivotab hänele tervhut, pit’käd elod i uzid tedosatusid.
— Toivom, miše sur’ mahtišt da levedad tedod abutaižiba Teile tehta äi tedoavaidusid, kirjutaba Irma Ivanovnan kollegad Karjalan tedokeskusen oficialižel lehtpolel.
Irma Mullonen om professor, Venäman da Karjalan Valdkundan arvostadud tedoradnik. Hän radab Karjalan tedokeskusen Kelen, literaturan i istorijan institutan kel’tedon sektoras, a mugažo “NORDICA” -tedopolidenkeskeižes tedo-openduzkeskuses. Irma Ivanovna om toponimišton tedai da baltianmeren suomalaižen kel’tedon specialist. Sen ližaks hän oppib onomastikan da etnolingvistikan problemoid, radab keliden kosketusiden poles.
Vodel 1978 Irma Mullonen lopi Petroskoin universitetan istorijaliž-filologižen fakul’tetan, hän openzihe “Suomen kel’ da literatur” -poles. Sid’ hän päzui opendamhas Sovetskijan Sojuzan Tedoakademijan Karjalan filialan aspiranturaha. Vodelpäi 1981 Irma Mullonen radab Kelen, literaturan da istorijan institutas, vozil 2005—2015 hän oli sen pämehen. Vodelpäi 1993 Irma Ivanovna opendab norid kel’tedomehid Petroskoin universitetas baltianmeren suomalaižen filologian kafedral.
Uzištoid neciš temas voib lugeda mugažo karjalaks da suomeks.
Tarkištele "Oma Median" Telegram-kanalad!
