Ilja TIminan fotokuva piäzi kanzoinvälizen fotokilvan finualah
Karjalazen fotokuvuajan Ilja Timinan fotokuva ”Luonnon nägymättömät piirdošuarat” piäzi Zolotaja čerepaha -kanzoinvälizen kilvan finualah.
Tämänvuodehizeh kilbah oli työtty 1 4914 fotokuvua 3 576 ristikanzas 98 muaspäi. Iellizih kilboih yhtynyzien mualoin luvettelo suureni, kilbah yhtyi vie kaksi muadu — Laos da Burkina-Faso.
Meigäläine Ilja Timin työndi kilbah kaksi fotokuvua.
— Finualan nelländekseh piäzi kaksi kuvua. Enzimäine — ”Karjalaine kameja”. Luadie moine kuva jo ammui himoitti. Vaigei oli ”udogie” pädjäh päivypastoh da suaja kuvahazet, ku net oldas pystyviivah nimettöman lammin valgiele muale. Sih niškoi pidi olla tietys kohtas tiettyh aigah. Edukädeh yksikai ei sua tiediä, ku kuva roihes hyvä, sendäh ku ilmu muuttuu da ennepäi et arbua, kui korgiet puut ollah lammis ymbäri da kui pitkän kuvahazen net luajitah, sanoi Oma Mediale Ilja Timin.
Toine Timinan kilbah työtty kuva The Invisible Compass of Nature — Luonnon nähymättömät piirdošuarat.
— Karjalan jovet matkatah lagieloi kohtii myöte, yhtelläh on kohtua, kudamis joven tiel on kallivo da sit kohtas jovensuu rodieu kaidu. Sidä kohtua vaste vezi pyöriy vastuvirdah. Konzu vezi jiädyy toiči rodieu ihan oigieloi pyöryžii jiäpaloi. Pieni jiäpalaine uidelou kruugan myödäh da kazvau. Se jatkuu sinnessäh, kuni jiä ei kazva randas randah suate libo kuni ei pakastai. Kuva on luajittu Karhumäin piiris. Kumsa-jovele myö puutuimmo juuri sih samah aigah, konzu jiäpala heitti pyörindän, sendäh ku pakkaine yldyi, ga ei vie tartunuh randah, sanoi Ilja Timin.
Petroskoilazen fotokuvuajan sanoin mugah, kilbah on työtty ylen hyviä fotokuvua korgiedu luaduu. Kilvan luadijoin sanoin mugah kaikis aktiivizembat ollah Kitai (486 hengie); Iran (321 hengie), Indija (280 hengie), Italija (76 hengie) da Ispanija (65 hengie).
