IFUSCO 2021 om udes formatas
Pandemijan taguiči IFUSCO-konferencii pidetas internetan abul. IFUSCO – nece om jogavoz’ne rahvazkeskeine konferencii üläopenikoiden täht. Se om omištadud suomalaiž-ugrilaižile rahvahile, heiden kelile i kulʼturile.
—Joga voden IFUSCO mäni udes lidnas. Minä iče ühtnin neche konferencijaha nelʼlʼ kerdad: Venämal, Germanias, Suomes i Polʼšas. Minä kucun Karjalan üläopenikoid i aspirantoid ühteta IFUSCO-konferencijaha täl vodel, sikš miše nece om parahim voimuz starinoita ičeze oppindoiden polhe i tundištadas uzidenke mehidenke, sanub Sergei Minvalejev, Karjalan tedokeskusen radnik.
Täl vodel suomalaiž-ugrilaižiden rahvahiden da keliden oppijoil om voimuz ühteta konferencijaha internetan kal’t. Sen täht pidab täutta pakičuz.
IFUSCO-konferencijad tegeba üläopenikad üläopenikoiden täht vodespäi 1984.
