Iževskas mäneb ”Mir dialogas”-forum

Svetlana Gotič starinoičeb ezitatoiden kodikelen da kul’turan kaičendas da popul’arizotandas. Kuva: Udmurtian rahvahiden sebruden pertin arhivaspäi.

Iževskas radab ”Mir dialogas”-forum, miččele kerazihe 150 rahvahiden ezitajad Venäman 40 regionaspäi. Forumaha ühtneba Tverin karjalaižed, vepsläižed, udmurtad, beserm’anad, ižorad i toižed rahvahad. Forumal vepsän rahvahst ezitab Kalagen školan pämez’ Svetlana Gotič.

Joga voden Vepsän kul’tursebr ühtes Kalagen školanke da administracijanke vedäba školas erazvuiččid azjtegoid, miččed om oigetud vepsän rahvahan kelen, kul’turan da tradicijoiden kaičendaha, kehitoitandaha i popul’rizoitandaha. 

— Minä ühtnin sekcijaha, kus pagištihe kundaližiš iniciativoiš. Starinočin Vepsän kul’tursebran projektoiš, meiden Kalagen ”Kalarand”-etnoparkan rados, vepsän kelen opendamižes školas. Meiden mahtišt kodikelen da kul’turan kaičendas da popul’arizotandas tuli kaikile mel’he. Forum tuli lujas mel’he, mö jagoimoiš ičein mahtištol, vajehtimoiš satusekahil praktikoil, starinoičeb Svetlana Gotič.

Vepsän kelen kursad aigvoččiden täht, taidehstudii lapsiden täht, erazvuiččed mastar’-klassad, miččihe ühtneba sijaližed eläjad, a mugažo vodeorolikoiden tegemine, audiokirjoiden änetamine – kaik nece mel’dütoitab vepsän norištod ezitatoiden kul’turaha da kel’he.

Kaikiden ezitusiden pohjal keratas nevondoid da taričendoid, miše panda rezol’ucijaha.