Humahuš keriäy rahvastu: festivuali Viola Malmin mustokse
Karjalan piälinnas piettih jo viijes alovehienväline kanzallizen kul’tuuran lapsien da nuorien Humahuš -festivualii.
Pruazniekku piettih kuulužan kul’tuurualan ruadajan Viola Malmin 94-vuozipäivän kunnivokse da omistettih festivualin enzimäzele ohjuajale Natalja Kaširinale. Festivualin valmisti opastus- da luomiskeskus «Petrovskii dvorets» Kanzallizen da allovehellizen poliitiekan ministerstvan kannatuksel.
Kahten päivän aloh lahjakkahat nuoret tuttavuttih rahvahien perindölöih da iče ozutettih omii neroloi laval da muaster-kluasois. Enzimäzenny päivänny lavale kerävyi enämbi 16 kollektiivua kunnivoimah Viola Malmin mustuo da jatkamah hänen juurrettuloi perindölöi. Festivualin ozanottajat ozutettih noumeroloi, kudamat kuvastetah Karjalan kanzoin horeogruafiedu, muuzikkua da pajoloin rikkahuttu. Kollektiivoin ozanottajien igä oli 7 vuvves 35 vuodeh suate.
— Festivualin enzimäzenny päivänny minul dovarišanke oli enziozutus suurel laval. Kandelehil myö soitimmo kaunistu Sunnuntaiaamuna kirkonmäellä -sävelmiä, kudai kuuluu meijän pajo-ohjelmistoh. Laval, tiettäväine, oli varavuo, ga myö hyvin piäzimmö. Hyvä, ku nuoril on mahto ozuttua omii neroloi, sanoi Oma Mediale Kandeleh-joukon soittai Angelina Kondrat’uk.
Toizen päivän ohjelmas oli äijy muaster-kluassua da opastuspiduo. Muzikantat opastettih festivualin gostii soittamah kandelehel, balalaikal da toizil soittimil. Opastajat da arvostetut kul’tuurualan ruadajat saneltih karjalazien pruazniekkusovis, tunnustettih nuorii da heijän vahnnembii pruazniekkukul’tuurah. Sidä paiči festivualin ozanottajat oldih ekskursies opastuskeskuksen kodialovehmuzeis da opastuttih luadimah perindöllisty tyttii.
Yhty Oman Median kanualah Telegramas!
