Ühtnegat školprojektoiden rahoitusen konkursaha!
1. keväz’kud zavottihe školprojektoiden rahoitusen konkurs, siš tedotadas Karjalan Pämehen Artur Parfenčikovan VKontakte-lehtpolel.
Nece konkurs tehtas “Norišt da lapsed” -valdkundaližen projektan aigan. Täl vodelpäi sada rahoitusen ičeze projektan todenzoitamižehe voiba kut školad, muga i kolledžad da tehnikumad.
Muloi konkursale oli oigetud 55 pakičust, vägestajikš tegihe 11 školad. Satuseks voib lugeda sidä, miše Pudož-lidnas oli udessündutadud saldatoiden arvtegoiden muzei, Medvežjegorskan školas Aleksandr Fan’aginan nimel tehtihe “Kondi”-mediakeskuz, Petroskoin školas №55 azotadihe “melekaz” kazvatuzhonuz, a školas-internatas №24 oli sätud “Kreativ-Kub”-laboratorii. Männudel vodel vägestajiden keskes oli Šoutjärven škol, mitte sai rahatugen “Teatrpaja”-projektan tegemižehe.
— Tarikat ičetoi idejad! Teil om völ jänu aig sihe, miše löuta üks’henged, kerata joukun da starinoita projektas teiden školan vai tehnikuman openikoile. <…> Rohjekat! Toivotan kaikile ozad, kirjuti Artur Parfenčikov ičeze oficialižel VKontakte-lehtpolel.
Konkursan školetap jatkub keväz’kun 27. päivähasai. Toižen etapan aigan linneb voibištelend valdkundan parahimiden školprojektoiden keskes. Vägestajad nimitadas sulakun lopus. Ičeze projektan todenzoitamižehe voib sada ei enamba 500 tuhad rubl’ad.
Uzišt neciš temas voib lugeda mugažo suomeks.
Tarkištele "Oma Median" Telegram-kanalad!
