”Hobedaine nabornik”-festival’ mäneb Nevan randoil
Sügüz’kun 12.—13. päivil Piteriš mäneb V jubileifestival’ ”Hobedaine nabornik”. Nece om sur’ rahvahan kul’turpraznik, miččele tuleba parahimad pajo- da kargkollektivad Mariupolišpäi, Belorussiaspäi i kaikes Pohjoiž-Päivlaskman polespäi. Karjalan Valdkundad ezitaba festivalil Vepsän rahvahan hor i Venälaižen pajon hor ”Pitarici”.
— Mö olem hüviš meliš, miše ajam necile festivalile ezitamha meiden kul’turad. Kaiken om melentartušt kacta i kundelta toižid kollektivoid, sada uzid melentartuižid tundištoitusid, sanub Vepsän horan ühtnik Natalja Anhimova.
— Festivalil radaškandeb mastariden jarmark. Meiden mastarid ozutaba adivoile Karjalan kul’turan čomut ičeze tehmusiden kal’t, sanub Natalja.
Festivalil voib čukloutas istorijaha ei vaiše pajoiden, karguiden da mastar’-klassoiden abul, no mugažo uziden tehnologijoiden abul. Festivalin aigan radaškandeb mobil’planetarii ”Piterin legendad da starinad”. Se tob teid Piterin sündundan aigoihe, tundištoitab lidnan ezmäižiden eläjiden starinoidenke i eskai voib vastatas P’otr Ezmäiženke.
