Heinkun “Kodima”: jubilejad, praznikad, ajelused
Läksi eloho heinkun “Kodima”, miččel om todesine kezail’mišt. “Periodika”-painišt praznuiči ičeze 35-vottušt jubilejad: praznikale tuliba painišton radnikad i sebranikad, Karjalan rahvahiden ezitajad, rahvahaližiden keliden tundijad da navedijad. Ozatelendsanoid “Periodika” sai valdmehilpäi-ki, kudambad arvostaba painišton mahtokahid radnikoid da heiden äivottušt radod.
Vepsläižiš küliš mugažo oli veslas: sigä mäniba tradicionaližed vepsän rahvahan praznikad: Šoutjärves — “Elonpu”, Kalages — “Kalarand”. Čoma “Elonpu” kerazi lujas äi rahvast: adivod oliba muzejas, ühtniba praznikaližehe astundaha i konkursoihe, kundliba vepsläižid pajoid, paštoiba kalitoid mastar’-klassal, ostiba ičeleze muštoks erazvuiččid tehmusid. “Kalarand” ihastoiti ristituid tradicionaližil karguil da vändoil, vepsän kelen viktorinoil, magukahal lemel da čomal koncertal.
Neche nomeraha putui sur’ pagištoituz tetabanke vepsläiženke taidehmehenke Aleksei Maksimovanke — hänele om täudnus 50 vot.
— Aleksei om lujas melentartuine da lahjakaz mez’. Hän om tetab taidehkuvanik, no mugažo runoilii da pajatai. Aleksei tegi čomid kuvid vepsänkeližen “Kalevalan” täht, hän om sur’ Karjalan rahvahiden kul’turan da tradicijoiden navedii. Pagištoitusen abul voib tundištadas hänenke paremba, sanui “Oma Media” -portalale “Kodiman” toimitai Galina Baburova.
Mi koskeb alelusid, ka kezakun lopus Karjalaha tuli delegacii Vologdan agjaspäi — Borisovon da Timošinon školiden openikad i opendajad oleskeliba Šoutjärves da Petroskoiš. Karjalan naižiden delegacii (Ol’ga Šmajenik, Natalja L’vova, Natalja Silakova, Maria Košeleva, Nina Koren’kova, Jevgenia Šustova, Ol’ga Sirnova da Larisa Čirkova) ühtniba II Pohjoižen naižiden forumaha, mitte mäni Moskvas “Venäma”-keskuses.
Mugažo udes nomeras om sudäntkoskii Raisa Gavrilovan starin hänen kodiküläs, Maigär’-küläs, Nadežda Agapitovan muštlotesid dedoin polhe, Gul’a Polivanovan runotust.
Johtutam, miše “Kodima”-lehtesed jagetas maksuta.
Tarkištele "Oma Median" MAX-kanalad!
