Haukkašuaren kešäkoulu piätty
Mujejärven piirissä Haukkašuarella arkkitehtien, puušeppien ta kirvešmiehien kešäkoulun aikana entissetäh Pottojevin aittua, kylän tuulimyllyö ta Kanasien riihie.
Nuoret ihmiset kahekši netäliksi tullah Haukkašuarella opaštumah ta ruatamah ammatimiehien johtamissa ryhmissä jo viisi kešyä peräkkäh. Kešäkoulušša on kakši kirvešmiehien ryhmyä: yksi rakentau myllyö, toini – riihie, on puušeppäryhmä, kumpani veistäy puukorissukšie ta on käsityöryhmä, kumpasešša opaššutah ompelomah ta luatimah käsitöitä.
— Myö kaivoma riihen pohjan, jotta varmah tietyä missä oli šen ovi, missä šeiso kiukua. Näkimä, jotta riihi šeiso kivialuštalla, tiijuštima šen kokoja. Niise tänä vuotena tiijuššin enemmän Haukkašuaren kiriköštä. Šiitä rakennettih časoun’akši, ka myöhemmin rakennettih alttari ta še tuli kirikökši, šano kirvešmiehien ošaššon vetäjä Aleksanteri Jaaskelainen.
— Myö rupesima rakentamah riihie. Tänä vuotena emmä kerkie noštua šitä, ka enši vuotena varmašti lopetamma. Niise puušeppäošašto valmisti korissukšie aittua varoin ta myö panima niitä kattoh. Naiset ommeltih tänä vuotena miešpukšuja ta kuvottih nieklalla, lisäsi Haukkašuaren koulun johtaja Konstantin Petrov.
Kešäkoulun viimesenä päivänä piettih Haukkašuaren kyläpäivyä. Vierahat tultih kaikista lähikylistä. Päivän piätapuhtamana oli jauhinkivien ašettamini mel’l’iččäh.
Aihiešta voit lukie niise venäjäkši.
