Hüvin mänetada lebuaigad školan lageriš
Petroskoin Suomalaiž-ugrilaižes školas pästusiden aigan tehtas lager’ 1.-6. klassoiden openikoiden täht.
Lagerihe ühtneb 60 last. Heiden täht om vaumitud eripoline programm nedalikš. Kaikutte päiv om omištadud miččele-ni ühtele tedole. Lapsed melentartuižes formatas saba tedoid biologijas, matematikas, mantedos i muga edemba. Kaikuččel päiväl programmas om likund- vai muzikurok.
Urokad lageriš mäneba homendesespäi päivähasai.
— Ezmäižiden päividen jäl’ghe meil om jo hüvid arvostelusid lapsiden kazvatajilpäi. Hö sanuba, miše lapsile om mel’he olda lageriš. Iče kazvatajad oma ihastusiš, miše heiden lapsed pästusiden aigan oma sebranikoidenke, tegeba mida-ni melentartušt, ei ištkoi lopmata tedomašinoiden taga, sanub školan socialine radnik, literaturan, venän da vepsän keliden opendai Kristina Strelkovič.
Pätničan 1. sulakud lageriš om Karjalan rahvahaližiden keliden päiv. Lapsidennoks tuleba ”Kipinä”-kulehtesen radnikad, hö vaumičiba openikoile viktorinad Karjalan rahvahan kul’turas da erazvuiččid likundvändoid.
