Grimmin velleksien suarnoi kiännettih karjalakse
Karjalan kanzallizes kirjastos ezitettih karjalakse kiännettylöi Grimmin velleksien suarnoi. Karjalan kielen livvin murdehele kiännettylöi suarnoi suau lugie sähkökirjas. Karjalan kielen kursiloil opastujat omassah opastajan Tatjana Baranovan piän al kiännettih Grimmin velleksien kuulužii suarnoi.
Kiännettäväkse on otettu vuvvennu 1936 Leningruadan Detgiz-julguamos painettuh kirjah kuulujat suarnat, kuduat valmisti jullattavakse runoilii Aleksandr Vvedenskii.
Kiännösruaduo ruattih Inoi/Rodnoi-projektan mugah, kuduadu Karjalan kanzalline kirjasto todevuttau vuvves 2018 algajen.
— Projektas opimmo lujoittua niilöi kielitiedoloi da -neroloi, kudamii opastujat suajah kursiloil. Kiännös sikse on ylen hyvä. Enzimäi minä iče rubein kiändämäh, sit ruadoh tartuttihgi kielikursiloil opastujat. Heijän kiännöksii, tiettäväine, minä jällespäi kačoin da kohendelin, sanoi Oma Mediale Tatjana Baranova.
Kaheksa vuottu projektas karjalan kielen kursiloil opastujat tuttavutah meijän muan da vierasmualazien kirjuttajien elaigah da tuotandoh, šeikuijah kirjalližustekstoi da kiännetäh niidy livvikse.
Vvedenskoin kirju ammui on erinomaine harvinažus. Nygöi rahvas voijah nähtä da lugie Grimmin velleksien suarnoi kaksikielizes sähkökirjas — ven’akse da karjalakse täs. Kirjah kuuluu 11 kiändäjän 18 kiännösty. Sit löydyy kuulužua suarnua — Bremenan soittajat, Hajutoi Gans, Padaine kuaššua, Roihkei ombelii, Ruskei šuapkaine da tostu.
Yhty Oman Median kanualah MAX:as!
