Grigorii Ledkov jäti Associacijan pämehen radsijan
Moskvas sulakun 25. päiväl mäni Venäman Federacijan Pohjoižen, Sibirin i Edahaižen Päivnouzman igähižiden vähäluguižiden rahvahiden associacijan X suim, mitte oli omištadud Associacijan 35-voččele jubilejale. Suiman delegatad tegiba tehtud radon ühthevedoid, valičiba uden Associacijan presidentan i vahvištoitiba radon planan nelläks vodeks.
Grigorii Ledkov jäti Associacijan pämehen radsijan. Associacijan presidentaks tegihe Aleksandr V’ačeslavovič Novjuhov, senator Hanti-Mansijskan avtonomižes ümbruzkundaspäi.
Azjtegoho ühtni läz 400 igähižiden vähäluguižiden rahvahiden ezitajad 27 Venäman subjektaspäi.
Praznikazjtegoiden aigan pauklahjoitihe igähižiden vähäluguižiden rahvahiden ezitajid sures panendas kul’turan da tradicijoiden kaičendaha. Heiden keskes — Larisa Čirkova. Hän sai kitändkirjeižen Venäman Federacijan tedoiden levenzoitandan ministerstvaspäi.
— Om mel’he, miše tehtud rad homaitihe i muga korktas arvosteldihe. Radam edemba vepsän rahvahan hüvüdeks, sanub Vepsän kul’tursebran pämez’ Larisa Čirkova.
