“GigaChat”-neiroverk “pagižeškandeb” Venäman rahvahiden kelil
“Ruwiki”-internet-tedokirjan press-služb tedotab, miše projektan avtorad andoiba “Sberan” “GigaChat”-tegointellektan kehitoitajile enamba 1 400 000 kirjutest 20 kelil. Nenihe kirjutesihe om keratud materialoid Venäman rahvahiden tradicijoiš, istorijas da kul’turas.
— Meiden pätegend om tehta muga, miše kaik voižiba lugeda tedokirjan kirjutesed Venäman rahvahiden kelil. Mö nägem, kut nügüdläižed tehnologijad abutaba kaita kul’turad da tedoid, miččed voiba kadoda. Meid ihastoitab, miše “Ruwikin” avtorad tegeba panendan generativižen tegointellektan kehitoitandaha, i ani pigai nece tegointellekt el’gendaškandeb meiden man erazvuiččid kelid, sanui “Ruwiki”-internet-tedokirjan pämez’ Vladimir Medeiko.
Anttud materialad oma vepsän da karjalan kelil, a mugažo altajan, baškiran, bur’atan, mägimarin, marin, ingušan, kalmikin, komin, komi-permin, mokšan, tataran, tuvan, udmurtan, hakasin, čečenan, čuvašan, erz’an da jakutan kelil.
“Ruwiki” om nügüdläine venälaine internet-tedokirj, miččehe om ližatud tegointellekt. Se abutab antta tarkembad vastused kävutajiden küzundoihe da süvemba oppida materialoid.
Uzištoid neciš temas voib lugeda mugažo suomen da venän kelil.
Tarkištele "Oma Median" Telegram-kanalad!
