Fotokuvadai Petroskoišpäi sai koumanden sijan rahvahidenkeskeižel fotokonkursal
“Kuldaine čerepah”- konkursan ”100 parahint londusen fotokuvad” -lugetišhe putui viž Ilja Timinan fotod. Üks’ neniš fotoišpäi sai koumanden sijan “Londusen taideh da irdnägo”-rubrikas.
— Vodel 2017 jo ühtnin neche konkursaha, siloi minun foto, mitte oli tehtud Arhangel’skan agjas, sai ezmäižen sijan. No minai oli uništuz, miše oliži arvostadud meiden čoman Karjalan londuzkuva. Täl vodel se ozastui, sanub Ilja.
Foton nimi om “NLO – tundmatoi jäine objekt”. Se oli tehtud Oloncan rajonas Olonka-jogen päl.
Ilja ajoi Moskvaha necen projektan festivalin avaidusele, kus sai ičeze pauklahjan, Festivalin aigan om avaitud konkursan parahimiden fotoiden ozuteluz da mäneba mastar’-klassad. Ozutelusel om ezitadud londusen, linduiden, živatoiden da kazvmusiden kuvid da erašti sihe om ližatud hajumujatesid.
