Folklori ta kulttuuri ei pölytä
ETNO-matkuštamini on Karjalan kanšallisen musejon uuši opašretki. Še valmissettih Kalevalan kuukauvekši, kummaista pietäh musejošša tuiskukuušša ta kumpani on omissettu Kalevalan päiväkši.
Opašretki kulkou musejon salija myöten ta tuttavuštau vierahie runoih ta runolaulajih, kanšallisih šoittimih, miehien ta naisien ruatoloih, folklorih ta kulttuurih. Opaš – Sofja Nikitina antau erikoista huomijuo lauluperintehellä, joka teemalla hänellä on valittu šopiva loičču tahi laulu ta hiän antau vierahilla kuunnella niitä ta šelittäy nuorilla epäšelvie as’s’oja.
— Käyttyän monivuotista kokemušta tieto-näyttely- ta opaššušošaštojen spesialistit valmissettih tämä kierroš, jotta näyttyä nuorilla ihmisillä, jotta istorija ta folklori, kulttuuri ta perinneh ei pölytä, jotta še on mukava nykypäivinäki. Myö käytämmä erilaista musiikkie: runojen nauhotukšie ta Myllärit-ryhmän lauluja. Še on meijän ruavon uuši muoto ta še pitäy jatkua ta kehittyä, šano Kanšallisen musejon spesialisti, opaš Sofja Nikitina.
Kierrokšen aikana on tuttavuštumini musejon nelläh salih. Karjalaisien elämäštä kertomukšien lisäkši on äijän esimerkkijä, mimmosie uškomukšie ihmisillä oli ta mimmoset loičut hyö käytettih eri tapahukšissa.
Opašretki on šuosittu, joka päivä musejo ottau vaštah kakši-kolme ryhmyä. ETNO-matkuštamiseh voipi piäššä tuiskukuun loppuh šuaten, ka musejošša šanotah, jotta, još tulou lisyä halukkahie kierroš järješšetäh iellähki.
