Hanti-Mansijskas lopihe rahvazkeskeine ekologine fil’moiden festival’. Festivalile oli oigetud 350 fil’mad 40 maspäi. Rahvahaližen toimišton GTRK ”Karelia” fil’m vepsän kelel ”Vepsän rahvaz. Linneb-ik homen?” tegihe konkursan laureataks ”Etnoekologija” (londuz da igähižed rahvahad)-nominacijas.
Rad fil’man tegemižes jatkui 16 vot. Fil’man sjomkad mäniba Vologdan agjas vepsläižes deröunas – Päžjärves. Fil’m om Triškinoden kanzan polhe. Heiden kanzas vepsän kel’ da rahvahan tradicijad anttas pol’vespäi pol’vhe. Nece vepsläine pereh kaikel hengel navedib ičeze kodiröunad da kodikel’t, mitte om surman kündusel.
— Minun kollegoile ozastui snimda mugoižid harvinaižid kadroid, ozutesikš, baban voikud, paimnen barabananke, kut jauhtas ozrad kivel da vededas heinäd hebol. Päžjärvelaižed oma lujas hüväd, avoinsüdäimeližed, adivočetajad ristitud, olen mel’dunu Päžjärvehe, sen eläjihe. Tundmused jäiba parahimad. Toižes polespäi om opal, sikš ku koleba ristitud, külän eläjid tegese vähemba, nored ajaba lidnoihe..., jagase ičeze tundmusil üks’ fil’man tegijoišpäi Maria Filatova.
”Vepsän rahvaz. Linneb-ik homen?”-fil’m tuli mel’he äjile kacujile. Nece material om čudokaz da melentartuine ei vaiše dokumentaližen fil’man täht, no tedomehiden-ki täht. Fil’m voib löuta Internetas.