Festival’ Nikolai Abramovan muštoks mäneb Podporožjes
23. vilukud Podporožjen rajonan keskuzkirjištos mäneb “Nikolai Abramovan pirdaižid” -festival’ (6+). Se om omištadud kahtele znamasižele päivmärale: Nikolajan Abramovan 65-voččele jubilejale sündundpäiväspäi da 10-voččele jubilejale hänen surman päiväspäi. Siš tedotadas Podporožjen rajonan keskuzkirjišton oficialižel VKontakte-lehtpolel.
Nece festival’ tehtas “Penen rahvahan sur’ runoilii” -kirjištprojektan aigan. Sen pätegend om kaita lahjakahan vepsläižen runoilijan kul’turjäl’gestust, tundištoitta adivoid hänen sädandan erazvuiččiden polidenke da popul’arizoitta sidä uzil mahtoil.
Festivalil planuitas avaita “Abramovan pirdaižid” -taidehozuteluz. Nece om Dmirtii Gridinan, kudamb tunzi Nikolajad, pirdatusiden kogomuz. Sihe mülüb pirdimel i mustal kirjutimel tehtud 10 ekspressivišt radod. Jogahine pirdatuz om Nikolai Abramovan runon vizualine versii, mitte om nimitadud runon nimel (“Vepsläižed joged”, “Kibu”, “Än’”, “Zirkol” da toižed).
– Kaik radod oli tehtud voden 2025 aigan Nikolajan suren jubilejan täht. Taidehtehnik om ani prost: Dmirtii tegi eskizan pirdimel, a sid’ – pirdaižid mustal kirjutimel. Kuvad oli tehtud al’bomas, a sid’ skaniruidud da paindud suren formatan fotobumagal, starinoičeba Podporožjen kirjišton radnikad VKontakte-lehtpolel.
Ozutelusen ližaks festivalin adivoiden täht om vaumištadud literaturižed adivhonused, mastar’-klassad, vändod da fotozonad. Festivalin tegijad kucuba ühtnemaha azjtegoho Nikolai Abramovan sebranikoid da ühtesradnikoid, kirjišton holitajid, opendajid i openikoid, a mugažo kaikid venälaižen da vepsläižen kul’turiden navedijoid.
“Nikolai Abramovan pirdaižid” -festival’ mäneb 23. vilukud 12:00 časud adresadme: Podporožje-lidn, Leninan prospekt, 9.
Päzund azjtegole om kaikile tahtnikoile maksutoi.
Tarkištele "Oma Median" Telegram-kanalad!
