Tal’vkun 10. päiväl linneb ”Vepsläine neižne”-monospektaklin ezmäine ozutez. Se mäneškab Karjalan kul’turan da taidehen kolledžas Sovetskijan Sojuzan Gerojan Anna Lisicinan nimel. Monologad lugeškab Karjalan arvostadud artistka Aleksandra Aniskina.
Monospektakl’ starinoičeb vepsläižen neiččen Anna Lisicinan elon polhe. Materialad hänen polhe kerazi iče Aleksandra Aniskina ajedes külidme erazvuiččihe agjoihe.
— Spektakl’ om omištadud Anna Lisicinan elo-ozale, hänen rahvahan kul’turale, tradicijoile. Tedoid necen polhe om vähä, sikš ajelim Segežaha, Kalagehe, Šoutjärvehe, Šokšuhu, Nikol’skoje-külähä, kus ristitud muštaba hänen polhe i voiba jagadas tedoil. Äi tedoid mö saim kirjoišpäi-ki, starinoičeb Aleksandra Aniskina.
Spektaklin pätegend om johtutada ristituile neciš sures aigtegos, siš, miše kaikutte meišpäi voib panda ičeze armastust, henged kodiman kehitoitandaha.
— Tahtoiše ozutada necen monospektaklin Änižröunas, ezmäi kaiked norile, lapsile, miše hö tedaižiba ičeze kodiröunan istorijad, gerojid i voižiba ülevas starinoita necen polhe toižile, sanub Aleksandra.
Om toiv, miše tulebas vodes nece spektakl’ ozastub ezitada rajonoiš-ki. Sen täht Aleksandra om tehnu matkspektaklin, miččen täht ei tariž äi teatrdekoracijoid, miše enamba ristituid voiži kacta spektaklin i tedištada rohktan vepsläižen neiččen polhe.
”Vepsläine neižne”-monospektakl’ om üks’ ”Vepsän rahvahan tütär”-projektan lopazjtegoišpäi. Projekt todenzoittas eloho Karjalan pämehen grantoiden fondan tugele.