Ezmäine keväden “Kodima” läksi eloho
Om pästtud eloho voden 2026 ezmäine keväden “Kodima”. Sen lehtpolil lugijad voiba löuta tedoid konkursoiš, ozutelusiš, festivališ, uziš da vanhoiš kirjoiš, ekspedicijoiš i äjas toižes.
Venäman rahvahiden ühtmuden voz’ zavodihe ani čomin. Surgut-lidnas mäni IV Ühthižvenälaine igähižiden vähäluguižiden rahvahiden kodikelen da literaturan suim. Sihe ühtni vepsläine delegacii, miččehe mülüi vepsläižed Karjalaspäi, Piterin da Vologdan agjoišpäi. Mugažo Moskvas mäni “Venäma om perehiden pereh” -tedotelendmarafon. Sihe ühtni vepsän kelen opendai Šoutjärvespäi Anastasia Jevtušenko.
Petroskoin “Periodika”-painišt ozuti voden 2025 kirjsatusen: sigä mäni “Kirjmel’nic” — jogavozne uziden kirjoiden prezentacii. Rahvahiden sebruden kodiš mäni etnodiktant vepsän kelel (aigemba mugoižed-žo etnodiktantad kirjutadihe Piteriš da Kujas). A Suomalaiž-ugrilaižes školas kirjutadihe kodikeliden olimpiadad.
— Ani bohat kul’turine elo kehub vepsläižiš küliš-ki. Kalages mäniba tradicionaližed suks’voibud, miččed om omištadud Anna Lisicinale. Sihe ühtni 75 sportmest vides školaspäi. A Šoutjärves mušttihe tetabad horeografad da Vepsän rahvahan horan tegijad Vasilii Ivanovič Kononovad. Muloi hänele täuduiži 120 vot, a täl vodel ičeze jubilei praznuičeb Vepsän rahvahan hor — sille täudub 90 vot, sanub “Oma Media” -portalale “Kodima”-lehtesen pätoimitai Irina Sotnikova.
Šoutjärven škol jagase ičeze mahtištol školprojektoiden tegemižes da taričeb uzid idejoid “Školan iniciativoiden rahatugi” -programman täht.
Emägoile linneb melentartušt lugeda venälaižiden sömižiden erigoičusiš. “Kodimas” jatkub kirjutesiden cikl “Karel’skaja kuhn’a i Točka” -projektan gastronomižiš ekspedicijoiš. Täl kerdal projektan ühtnikad ajoiba Pudožan agjan külihe keradamha sigä tradicionaližen keitändladun receptoid.
Sädon da istorijan nävedijoid ihastoitab se, miše Radonmahtoiden pertiš radab “Keradamižen aig” — tradicionaližen da istorijaližen sädon ozuteluz. Sil om pandud ezile mastarin Natalja Denisovan radod.
Literaturan navedijoiden täht vereses nomeras om paindud Oleg Mošnikovan arvosteluz Dmitrii Gorohan udehe starinaha “Žernova”, Jelena Filinan proza Irina Sotnikovan kändmižes da P’otr Vasiljevan runod Nina Zaicevan kändmižes.
Johtutam, miše “Kodima” jagetas maksuta.
Tarkištele "Oma Median" Telegram-kanalad!
