Ezmäižed kacujad jo arvosteliba ”Kuki-rikkun” uzid vipuskoid
“Periodika”-painištos mäni ”Kuki-rikku”-videožurnalan 5. da 6. vipuskoiden prezentacii. Prezentacijale tuliba penikaižed artistad, heiden vanhembad da sebranikad. Hö ezmäižin arvosteliba uzid videorolikoid.
Kaiked necil vodel ”Kuki-rikku”-videožurnalan kuvadandaha ühtni 17 last. Mugažo ühten videorolikan täht oli änetadud pajo. Siš azjas abutiba “Kičci-kočči”-ansambl’an ühtnikad.
— Männudel vodel tahtoim kuvata meiden videožurnalan vepsläižes rolikas Ol’ga Žukovan da hänen poigad. No nece ei ozastund meile. Täl vodel putui sil’mihe Ol’ga Žukovan pajoine. El’genzin, miše nece om čoma süžet meiden ”Kuki-rikku”-videožurnalan täht. Mö udes kucuim Ol’gan poigad ühtneda sjomkoihe, i Ol’gan mužik mugažo tartui neche azjaha. “Kičci-kočči”-ansambl’ surel tahtol tariči meile abud pajoižen ezitamižes necen rolikan täht, starinoičeb üks’ ”Kuki-rikku”-projektan ohjandajišpäi Maria Šašina.
Kaikuččes ”Kuki-rikku”-videožurnalan vipuskas om koume videorolikad: karjalan kelen livvin da pohjoižkarjalan paginal i vepsän kelel. Sjomkad mäniba Petroskoiš da londusel läz lidnad. Koume penikašt artistad jo ühtni männuziden vipuskoiden sjomkoihe. Toižed lapsed oliba artistoiden roliš ezmäižen kerdan.
— Minei om mel’he videorolik minun ühtnendanke. I minei tuli mel’he ühtneda sjomkoihe, hot’ nece oli jügedahk, jagoihe tundmusil 3. da 5. vipuskoiden artist Stanislav Sokolov.
Nügüd’ uded vipuskad pandas ”Kuki-rikkun”, Karjalaižiden, vepsläižiden da suomalaižiden kel’keskusen gruppoihe da ”Oma Media” -portalale, miše niid voiži kacta kaikutte tahtnik. Projekt om rahatugetud rahvahaližen da regionaližen politikan ministerstval.
Uzištoid neciš temas voib lugeda mugažo karjalaks.
